Bilməməyin Stressi
«Qəlbiniz narahat olmasın və qorxmayın.» Yəhya 14:27
Milli Psixi Sağlamlıq İnstitutu bir dəfə insan stress səviyyələrinə həqiqətin təsirini müəyyən etmək üçün bir təcrübə keçirdi. Dörd qrup əsgərə eyni sürətli yürüş tapşırıldı. Yürüş bitdikdən sonra hər bir əsgərin qanı stress hormonlarının səviyyəsi üçün yoxlanıldı. Yeganə dəyişən, hər qrupa yürüş haqqında nə qədər həqiqət söylənilməsi idi.
1-ci qrupa yürüş başlamazdan əvvəl bütün həqiqət söylənildi. 2-ci qrupa yürüşün 14 kilometr olacağı söylənildi, lakin sonra daha 6 kilometr əlavə edildikdə təəccübləndilər. 3-cü qrup yürüş boyunca dəyişən məlumatlar aldı. 4-cü qrupa heç bir məlumat verilmədi.
Yürüşün sonunda ən aşağı stress səviyyəsinə kimin sahib olduğunu təxmin edin? 1-ci qrup. Və niyə? Çünki, təcrübənin rəhbərinin gəldiyi nəticəyə görə, «Həqiqəti bilməklə canlı qalan ümid, zehni stress nəticəsində yaranan zərərli hormonların istehsalını yavaşladır.»
İnsanın ən böyük stressi, xüsusilə ölümdən sonra nə olacağı haqqında həqiqəti bilməməkdən qaynaqlanır. Müqəddəs Kitab bizə deyir ki, Allah bizə bütün həqiqəti Öz Oğlu İsa vasitəsilə verir, O, «həqiqətdir» (Yəhya 14:6). Və İsa bizə bütün həqiqəti söyləyir:
Atamın evində çoxlu otaqlar var... Mən sizin üçün yer hazırlamağa gedirəm... Mən qayıdıb sizi Özümlə aparacağam (Yəhya 14:2-3).
Pavlus yazırdı ki, İsanın dirilməsi həqiqətini bilməyənlər «bütün insanlardan daha çox acınacaqlıdırlar» (1 Korinflilərə 15:19).
Heç birimiz ölümdən sonra hara gedəcəyimizi bilməməyin stressindən əziyyət çəkməli deyilik. Müqəddəs Kitab həyat adlanan bu yürüşün sonu haqqında bütün həqiqəti söyləyir. Əgər bilməməyin stressindən əziyyət çəkirsinizsə, Müqəddəs Kitabı, Yəhya İncili ilə başlayaraq oxuyun. Və əlbəttə ki, biz sizin stressinizi azaltmağa kömək edə bilərik!
