Yuşiya digər iki padşah—Yehoşafat və Hizkiya—ilə birlikdə “Rəbbin gözündə doğru olanı etdi” deyilən padşahlar sırasına qoşulur. “Doğru olanı etmək” fikri Zəbur 1-də tapdığımızla oxşardır, orada oxuyuruq: “Nə bədxahların məsləhətinə əməl edən, nə günahkarların yolunda duran, nə də istehzacıların yerində oturan adam xoşbəxtdir; lakin onun sevinci Rəbbin qanunundadır və o, gecə-gündüz Onun qanunu üzərində düşünür.” “Xoşbəxt” sözü “şad” kimi tərcümə edilə bilər. Xoşbəxt həyatın yolu Rəbbin gözündə doğru olanı etməkdir!
İtaət Rəbb qarşısında dolğun və məmnun həyatın açarıdır. Tam itaətdən az olan hər şey qəlbdə bir boşluq yaradır və biz məmnuniyyət və tam razılıq tapa bilmərik. Zəburçu bizə xatırladır: “Sənə qarşı günah etməyim deyə, sözünü qəlbimdə gizlətdim” (Zəb. 119:11).
Bu cür iman və Allahın Kəlamına itaət Timoteydə tapılırdı, Pavelin ona verdiyi təlimatda oxuduğumuz kimi: “Heç kəs sənin gəncliyinə xor baxmasın, lakin sözdə, davranışda, sevgidə, ruhda, imanda, saflıqda möminlərə nümunə ol” (1 Tim. 4:12). Timoteyin uşaqlıqdan belə Allahın Kəlamına itaət etmək üçün bir qəlbi vardı (2 Tim. 3:15).
Yuşiya və Timotey arasında bir çox oxşarlıqlar var və hər iki halda Rəbb onları mükafatlandırdı, çünki onlar Onun Kəlamına cavab verdilər. Bəs bu gün biz necə? Allahın Kəlamına cavabımız nədir? Xatırlamaq yaxşıdır ki, “Rəbbin gözləri bütün yer üzündə gəzir ki, qəlbi Ona sadiq olanların tərəfində Özünü güclü göstərsin” (2 Saln. 16:9).
