«Əbədi həyat budur: Səni, yeganə həqiqi Allahı və göndərdiyin İsa Məsihi tanısınlar.» (Yəhya 17:3)
Allahı təcrübə yolu ilə tanımaq, Allah haqqında ilahiyyat dərsliyindən bilməkdən köklü şəkildə fərqlənir. Müqəddəs Kitaba görə, Onu təcrübə etməyincə Allahı tanıdığınızı deyə bilməzsiniz (Filipililərə 3:8, 10). Müqəddəs Kitab bilgisi həmişə təcrübəni əhatə edir. Müqəddəs Kitabda oxuduğunuz həqiqətlərin öz təcrübənizin reallığından daha zəngin olması sizi ruhdan sala bilər.
Əgər Allahın gücünün həyatınızda və sizin vasitənizlə işlədiyini təcrübə etməmisinizsə, Allahın gücü haqqında ikinci əl bilgisi ilə kifayətlənməyin, Onun başqalarında etdiklərinə sevinməyin. İsanın duası o idi ki, siz Allahı və Onun həyatınızdakı və təcrübənizdəki varlığını tanıyasınız. Sadəcə təcrübə etmədiyiniz üçün Müqəddəs Yazılarda təsvir olunan Allahın gücünü endirməyin.
Təcrübənizi Müqəddəs Yazıların standartına qaldırın; heç vaxt Müqəddəs Yazıları təcrübənizin səviyyəsinə endirməyin. Allahın sevgisi haqqında baş bilgisi ilə kifayətlənməyin. İsa dua etdi ki, siz Onun sevgisinin dərinliyini, genişliyini və hündürlüyünü təcrübə edəsiniz və həyatınızın gündəlik təcrübələrində Allahın sakit və sonsuz sevgisindən zövq alasınız.
Əgər təcrübə etmədiyiniz Müqəddəs Kitab həqiqətləri olduğunu hiss edirsinizsə, bu həqiqəti qarşınızda saxlayın və Allahdan onu gündəlik təcrübənizə gətirməsini istəyin. Allahdan Onun vədini almaq üçün etməli olduğunuz hər hansı bir düzəliş olub olmadığını soruşun. Allahın vədlərindən əl çəkməyin; onları tamamilə təcrübə edənə qədər onlarla qalın.
