22 yanvar 2023, bazar

Ya Rəbb, Sən mənim Allahımsan, Səni ucaldıram, adına həmdlər oxuyuram. Çünki Sən qədimdən bəri möcüzələrini, niyyətlərini Sədaqətlə həyata keçirdin.

Yeşaya 25:1

Ya Rəbb, mənim qismətimsən, kasama düşən paysan, Püşkümə düşən Səndən asılıdır.

Zəbur 16:5

Məni yenə də canlandırır, İsmi şərəfinə salehlik yolları ilə aparır. Ölüm kölgəsinin dərəsində gəzsəm belə, Şərdən qorxmaram, çünki Sən mənimləsən, Sənin əsan, Sənin dəyənəyin mənə təsəlli verir.

Zəbur 23:3–4

Amma daim Səninlə olmuşam, Mənim sağ əlimdən tutmusan. Nəsihətinlə mənə yol göstərirsən, Sonra məni şərəfə çatdıracaqsan. Göylərdə Səndən başqa kimim var? Yer üzündə də Səndən başqa heç nə istəmirəm. Cismim və ürəyim taqətdən düşsə belə, Daim, ey Allah, qəlbimin qüvvəti, nəsibimsən.

Zəbur 73:23–26

Bizim qəlbimiz Onda sevinc tapır, Müqəddəs isminə arxalanmışıq.

Zəbur 33:21

Rəbb mənə verdiyi vədə əməl edir. Ya Rəbb, məhəbbətin əbədidir. Öz əlinin işini tərk etmə!

Zəbur 138:8