Biz görmüşük ki, Pavlusun bu dünyadakı xidmətində göz yaşları olub. 31-ci ayədə də görürük ki, müqəddəsləri gələcək təhlükələr barədə xəbərdar edərkən göz yaşları töküb. O, bu dünyadan getdikdən sonra nə olacağını görüb. O, Məsih üçün o qədər qiymətli olan, Allahın Öz Oğlunun qanı ilə satın aldığı Allahın Kilsəsinə nə gələcəyini bilirdi (Həvarilərin İşləri 20:28–29). Eynilə, Musa da xəbərdarlıqlarına və yalvarışlarına baxmayaraq, ölümündən sonra İsrail övladlarına nə olacağını bilirdi (Qanunun Təkrarı 31:16–19). Qanunun Təkrarı kitabı bizə Musanın ürəyinin gözəl bir şəklini verir. Eynilə, Həvarilərin İşləri 20-də Pavlusun sözləri bizə həvarinin ürəyini göstərir.
O, Efesdəki müqəddəsləri gecə-gündüz göz yaşları ilə xəbərdar etmişdi. Rəbbin qoyunlarının necə dağıldığını və azdırıldığını düşünəndə heç göz yaşı tökürükmü? Həvari daha sonra sürüyə gələcək iki təhlükəni qeyd edir. Kənardan, imansızlardan, Allahın sürüsünü viran edəcək qəddar canavarlar olacaqdı. Bu, bu gün də baş verir!
İkincisi, “öz aranızdan”, hətta indi onun qarşısında duran bu kişilərdən, həqiqi möminlərdən, özlərindən sonra şagirdləri çəkmək üçün təhrif olunmuş şeylər danışanlar olacaqdı. Bir nümunə, dirilmənin artıq keçmişdə olduğunu öyrədən Himeney və Filet ola bilər (2 Tim. 2:17). Bu, günümüzdə niyə bu qədər yalan təlimin olduğunu və bəzən hətta həqiqi möminlərin belə Müqəddəs Yazının həqiqəti üzərində razılaşa bilmədiklərini göstərir.
Həvari Pavlus bu ağsaqqalları və bizi də xəbərdar etmişdi. Rəbb İsa tezliklə gəlir. Qışqırığını eşidənə qədər ayıq olaq (1 Saloniklilərə 4:16)!
