8 dekabr 2024, bazar

Ölülərin dirilməsi də belədir. Əkilən toxum çürüyər, ondan əmələ gəlib dirilən bədən çürüməz; əkilən toxum hörmətsiz, dirilən bədən izzətlidir; əkilən toxum zəif, dirilən bədən qüvvətlidir; əkilən toxum təbii, dirilən bədən ruhanidir. Təbii bədən varsa, ruhani bədən də var.

1 KORİNFLİLƏRƏ 15:42-44

İlk insan yerin torpağından, ikinci İnsan göydən yarandı.

1 KORİNFLİLƏRƏ 15:47

Alın tərinlə çörək yeyəcəksən. Axırda torpağa qayıdacaqsan, Çünki oradan götürülmüsən, Ona görə ki yerin torpağısan, Torpağa da qayıdacaqsan».

YARADILIŞ 3:19

Biri tamam güclü, Tamam rahat və qayğısız,

ƏYYUB 21:23

O biri isə dərd içində, Həyatdan kam almamış ölür. İkisi də torpaqda yatır, İkisinin də bədənini qurd basır.

ƏYYUB 21:25-26

Elə bunun üçün qəlbim sevinir, ruhum şad olur, Cismim əmin-amanlıqda yaşayır.

ZƏBUR 16:9

Dərim yox olandan sonra Bədən alıb Allahı görəcəyəm.

ƏYYUB 19:26

Bizsə səma vətəndaşlarıyıq və oradan Xilaskar olan Rəbb İsa Məsihi həvəslə gözləyirik. O hər şeyi Özünə tabe etməyə qadir olan qüvvəsinin təsiri ilə bizim yazıq bədənimizi dəyişdirib Öz izzətli bədəninə bənzər hala gətirəcək.

FİLİPİLİLƏRƏ 3:20-21

«Ya Rəbb, mənə bildir, Aqibətim necə olacaq? Ömrümün günləri nə qədər qalıb? Qoy nə qədər fani olduğumu anlayım!

ZƏBUR 39:4

Bizə öyrət nə qədər ömrümüz var, Qoy qəlbimiz hikmətli olsun.

ZƏBUR 90:12